Күнделікті нұр, 8 қыркүйек: Адам не ексе, соны орады дейді

Сен таразыға тартылып, жеткіліксіз деп табылдың дегенді.

Даниял 5:27

Себебі Тәңір Ие бәрін біліп тұрады, Құдай істеріңе әділ үкім шығарады!

Патшалықтар 1-ж. 2:3

Адамдар бұларыңды жоғары бағалағанмен, Құдай алдында ол — жексұрындық.

Лұқа 16:15

Себебі Құдай пенденің көзімен қарамайды ғой. Пенде назарын адамның бет-жүзіне аударады, Ал Жаратқан Ие оның жүрегіне көз салады.

Патшалықтар 1-ж. 16:7

Алданбаңдар: Құдай адамның Оны елемей, өз бетімен жүруіне жол бермейді. «Адам не ексе, соны орады» дейді. Өзінің ескі күнәкар болмысын қанағаттандырушы сол болмысқа тән өлімді орады. Ал Құдайдың Рухына қызмет етуші осы Рухқа тән мәңгілік өмірді орады.

Ғалаттықт. хат 6:7–8

Адам бүкіл дүниеге ие болып, сол себепті (мәңгілік) өмірінен айырылса, бұдан оған не пайда? Яки адам өз өмірі үшін қандай құн төлей алады?

Матай 16:26

Алайда осы «артықшылықтарымды» Мәсіхке бола залал деп санай бастадым.

Філіпілікт. хат 3:7

Сен жүректің таза болуын қалайсың.

Забур жырлары 50:8

Жүрегімді зерттеп, түнде де мені сынадың, Тәптіштеп тексерсең де, еш нәрсе таппадың.

Забур жырлары 16:3

Алғашқысы ретінде Мәсіх тірілді. Ал кейін, Ол қайтып келгенде, Оның қарамағындағы адамдар да тіріледі.

Қорынттықт. 1-хат 15:23

Егер бидайдың дәні жерге егіліп, жойылмаса, онда ол жалғыз дән болып қалады. Ал егер ол жерге егіліп, көктеп, өзі жойылса, сонда ғана одан көп өнім өсіп шығады.

Жохан 12:24

Алғашқы өнімнен пісіріліп, Құдайға ұсынылатын нанның қасиетті болатынындай, соның қалған қамыры да қасиетті. Сол сияқты, ағаштың түбірі қасиетті болғанындай, оның бұтақтары да қасиетті.

Римдіктерге хат 11:16

Алайда өлгендердің алғашқысы ретінде Мәсіх өлімнен біржола қайта тірілді!

Қорынттықт. 1-хат 15:20

Себебі біз осылай рухани тұрғыдан Мәсіхпен бірге «өліп», күнәлі өмір салтымыздан біржола бас тартқан болсақ, енді өлімнен қайта тірілген Мәсіхпен тығыз байланыста тұрып жаңаша өмір сүрейік!

Римдіктерге хат 6:5

Иеміз Иса Мәсіхті сағына күтеміз. Ол әлемдегі күллі нәрселерді де жеңіп бағындыру үшін қолданатын құдіретті күшімен біздің өткінші тәнімізді Өзінікі сияқты салтанатты денеге айналдырады.

Філіпілікт. хат 3:20–21

Ол — өлімнен қайта тірілгендердің ең Бастысы да.

Қолостықт. хат 1:18

Өлімнен Иса Мәсіхті қайта тірілткен Құдайдың Киелі Рухы өмірлеріңнен орын алды. Сондықтан Құдай бойларыңда тұратын Өзінің Киелі Рухы арқылы сендердің денелеріңді де өлімнен тірілтіп алатын болады.

Римдіктерге хат 8:11

Қайта тірілу мен шынайы өмір — Менмін. Маған сенетін адам өлсе де, шынайы өмір сүретін болады.

Жохан 11:25