Жохан бұл «өлімнен тірілген тұңғыш» терминін Иеміз Исаның кім екенін сипаттау үшін қолданғанда, Оны өлімнен бірінші болып тірілген адам ретінде айтып тұрған жоқ. Ескі Өсиетте өлімнен тірілгендер болған, мысалы, Зарефаттық әйелдің ұлы (1 Патшалықтар 17:8–24), немесе Шуламдық әйелдің ұлы (2 Патшалықтар 4), немесе тіпті Елішаның сүйектеріне тиген адам (2 Патшалықтар 13). Жаңа Өсиетте біз Жайырдың қызы, Наин жесірінің ұлы және Лазар туралы білеміз — олардың бәрі өлімнен тірілген.
Бірақ біздің аятымызда Иеміздің өлімнен тірілген тұңғыш екенін білеміз. Бұл сөз дәрежесі мен қадір-қасиеті, немесе орны бойынша бірінші деген ойды білдіреді. Бұл уақыт бойынша тұңғыш дегенді емес, артықшылықтағы тұңғыш дегенді білдіреді. Иеміз Иса ең жоғары орынды алады. Бұл мәсіхтік забурда анық көрінеді: «Мен Оны Өзімнің тұңғышым, жер патшаларының ең жоғарысы етемін» (Забур 89:27).
Иеміз Иса туралы келесі оқығанымыз — Ол «жер патшаларының үстінен билеуші». Барлығынан жоғары көтерілген соң, Ол жер патшаларының бәрінің үстінен билеуші! Ол мырзалардың Иесі және патшалардың Патшасы (Аян 17:14). Бұл алдағы күні, Мәсіх Өзінің даңқты келуінде оралғанда, барлығына айқын болады (19:11–16). Иеміз Иса жердің егемен Патшасы болып табылады және болады, бұл Ескі Өсиет бойында пайғамбарлық етілген (Забур 2:6–8; Еремия 23:5; Захария 9:9).
4 және 5-аяттарда Жохан Иеміз Исаға табынуға бірнеше себеп келтірген. Ол адал куәгер, өлімнен тірілген тұңғыш және жердегі барлық патшалардың билеушісі. Біздің баталы Иеміз Өзінің Тұлғасының даңқы мен Оның орындаған ісінің даңқы үшін табынуға лайық!
