Күнделікті нұр, 25 мамыр: Ием, қандай мол Сенің ізгілігің

Ием, қандай мол Сенің ізгілігің: Өзіңді қастерлеп.

Забур жырлары 30:20

Сен Өзіңді сеніммен күткендерге игіліктер жасайсың. Мұны істейтін бірде-бір өзге құдай жоқ! Бұрын-соңды ешкім ондай құдай туралы құлағымен естіп, көзімен көрген де емес.

Ишая 64:4

Алайда (Киелі жазбаларда) алдын ала жазылғандай, көз көріп, құлақ естімеген, адам ойына ешқашан келмеген игіліктерді Құдай Өзін сүйетіндерге дайындап қойған. Бұны Құдай біздерге Өзінің Киелі Рухы арқылы анық білдірді.

Қорынттықт. 1-хат 2:9–10

Шын өмір жолын маған көрсетесің, Көз алдыңда қуанышқа бөлейсің, Оң жағыңда мәңгі игілік бересің.

Забур жырлары 15:11

Уа, Құдай, Сенің рақымың қандай қымбат, Қанатыңның астын паналайды адамзат, Әлеміңнің игілігіне тойдырасың, Өзеніңнің рақатына қандырасың. Өйткені өмірдің қайнары Өзіңсің, Жарықты көреміз нұрыңда Өзіңнің.

Забур жырлары 35:8–10

Ал Құдайға ұнамды жүру барлық жағынан да пайдалы: Құдайдың уәдесі бойынша ол осы және болашақ өмірде де игілікті.

Тімотеге 1-хат 4:8

Құдайдың рухани Ұлынан хабар. Оның көздері оттай жалындап.

Аян 2:18

Адамның жүрегі бәрінен бетер алдамшы әрі жазылмайтындай бүлінген. Оны танып біле алатын кім бар? Мен, Жаратқан Ие, адамның жүрегіндегісін зерттеймін, оның жан дүниесін анық тексеремін. Содан әркімге жасаған қылығына, істеген істеріне қарай есесін қайтарамын.

Еремия 17:9–10

Сен күнәларымызды қойдың алдыңа, Нұрыңда айқын құпияларымыз да.

Забур жырлары 89:8

Сонда Иеміз бұрылып, Петірге қарады. ... Содан Петір сыртқа шығып, қатты жылады.

Лұқа 22:61–62

Алайда бәрінің ойы мен ниеті құбылмалы екенін біліп, Иса оларға сене қоймады. Ол адам баласының көңіліндегісін толық білгендіктен, біреудің Өзіне ол туралы мәлімет беруін қажет етпеді.

Жохан 2:24–25

Неден жаратылдық, соны түгел біледі, Топырақтан екеніміз Оның есінде.

Забур жырлары 102:14

Ол майысқан таяқты сындырмайды, Бықсыған білтені де сөндірмейді.

Ишая 42:3

Иеміз Өзінікі болған адамдарын жақсы біледі» және «Иеміздің атын атап сиынатын әркім жамандықтан алшақтасын!

Тімотеге 2-хат 2:19

Мен «ізгі Бағушымын». Әкемнің Мені, Менің Әкемді жақсы білетініміз сияқты, Мен қарамағымдағыларды жақсы білемін ... Өз «қойларым» даусымды естіп, бағынады. Мен оларды жақсы білемін, олар Маған еріп жүреді. Соларға мәңгілік өмір беремін. Олар ешқашан жойылмайды, ешкім оларды Менің қолымнан тартып та алмайды.

Жохан 10:14, 27–28