Күнделікті нұр, 19 сәуір: Сонымен, менің алар сыйым қайсы?

Сендерге өте маңызды шындықты айтамын: қойлар кіретін «есік» Менмін.

Жохан 10:7

Сол сәтте киелі үйдегі шымылдық кенеттен жоғарыдан төменге дейін қақ айырылып, екіге бөлінді.

Матай 27:51

Мәсіх те әділ бола тұра, әділетсіздер үшін азап шекті. Ол бізді Құдаймен табыстыру үшін күнәларымызға бола біржола құрбан болды.

Петірдің 1-хаты 3:18

Киелі үйдің алдыңғы бөлімі әлі де бар болып тұрғанда, ең қасиетті бөлімге (яғни Құдайдың алдына) апаратын жол ашық емес.

Еврейлерге хат 9:8

Мен «есікпін», Менен кіргендер құтқарылады. Олар емін-еркін кіріп-шығып, жайылым табады.

Жохан 10:9

Мен арқылы болмаса, ешкім де Әкеге бара алмайды.

Жохан 14:6

Екі жағымызға да Мәсіх арқылы бір Киелі Рухтың арқасында Құдай Әкеге сиынуға жол ашылды. Сонымен сендер енді не бөтен, не келімсек сияқты емес, Құдайдың халқы болып келген яһуди сенушілерімен бірдей, сол халықтың азаматысыңдар, тіпті «Құдайдың отбасысының мүшелерісіңдер»!

Ефестікт. хат 2:18–19

Сонымен, бауырластар, Исаның өз қанын төккенінің арқасында енді нық сеніммен ең қасиетті орынға кіре аламыз. Өйткені Құдай алдына баруымызға бөгет болған «шымылдықты» Иса өз денесін құрбан етуімен қақ айырып, біз үшін мәңгілік өмірге жаңа жол ашты.

Еврейлерге хат 10:19–20

Иеміз Иса Мәсіхке деген сеніміміз арқылы ақталғандықтан, Оның арқасында Құдаймен татумыз. Құдайдың осы рақымына бізге Иса Мәсіхтің арқасында, сенім арқылы жол ашылды. Енді Құдайдың рақымына бөленіп, салтанатты ұлылығын көреміз деген үмітімізге қатты шаттанамыз!

Римдіктерге хат 5:1–2

Онда Жаратқан Иенің сөзі жүрегімде жанып жатқан от сияқты, сүйегімнің ішіне қамалған шоқ іспетті болады. Оны ішімде ұстаудан қатты шаршадым, тіпті ұстай алмаймын да.

Еремия 20:9

Ол борышты міндетім: Ізгі хабарды уағыздамасам, қасіретке қалар едім. Сонымен, менің алар сыйым қайсы? Уағыздауымда құқықтарымды қолданбай, Ізгі хабарды тегін таратуым — алар сыйым, міне, осы.

Қорынттықт. 1-хат 9:16, 18

Әлгілерді шақырып алып, оларға: — Исаның атымен ешқандай уағыз айтпаңдар да, тәлім бермеңдер де! — деп тыйым салды. Бірақ Петір мен Жохан оларға: — Құдайды емес ... Ал біз көріп-естігендеріміз туралы үнсіз қала алмаймыз, — деп жауап берді.

Елшіл. істері 4:18–20

Мәсіхтің сүйіспеншілігі бізді алға басуға мәжбүр етеді.

Қорынттықт. 2-хат 5:14

Сондықтан қорқып, күмісіңізді жерге көміп тастаған едім. ... Әй, зұлым да жалқау қызметші! ... Сол үшін де күмісімді саудагерлерге қарызға беруің керек болатын. Сонда мен қайтып келгенде өзімдікін өсімімен қайтарып алатын едім.

Матай 25:25–27

Туысқандарың мен дос-жарандарыңа Жаратқан Иенің өзіңе не істегенін, қалай рақым еткенін айтып бер!

Марқа 5:19