Күнделікті нұр, 31 қазан: Уәдеңді орындайтын бола гөр

Билік күшімен де емес, тек Менің Рухыммен ғана табысқа жетесің! — дейді Әлемнің Иесі.

Зәкәрия 4:6

Кім Жаратқанның ақыл-ойын ұққан, Кеңесшісі болып бағыт берді Оған?

Ишая 40:13

Бірақ осы дүние кімдерді «ақымақ» деп санаса, Құдай «данышпан-ақылгөй» делінгендерді ұялту үшін соларды таңдап алды. Және осы дүние «күшсіз» деп тапқандарды Құдай «күштілерді» ұялту үшін Өзіне таңдады. Осы дүние маңызды деп есептейтіндерді жою үшін Құдай осы дүниенің менсінбей, қорлап, түкке тұрғысыз деп санағандарын таңдап алды. Осылайша Құдайдың алдында ешкімнің де мақтануына болмайды.

Қорынттықт. 1-хат 1:27–29

Жел қалаған жерінде соғады: оның гуілін естисің, бірақ қайдан келіп, қайда кеткенін білмейсің. Киелі Рухтан туылған әр адамның басынан өткені де осыған ұқсас, — деді.

Жохан 3:8

Пенденің қалауы бойынша бұл дүниеге келгендіктен емес, Құдай оларға шынайы өмір бергендіктен ғана Оның рухани балалары болды.

Жохан 1:13

Бұдан былай да Менің Рухым араларыңда тұратын болады. Қорықпаңдар!

Хаққай 2:5

Бұл шайқасты сендер емес, Құдайдың Өзі жүргізеді!

Шежірелер 2-ж. 20:15

Мұнда жиналғандардың бәрі де Жаратқан Иенің құтқару үшін семсер мен сүңгіні керек қылмайтынына көз жеткізетін болады! Себебі бұл соғысты Жаратқан Иенің Өзі жүргізіп, сендерді біздің қолымызға тапсырады!

Патшалықтар 1-ж. 17:47

Уәдеңді орындайтын бола гөр.

Патшалықтар 2-ж. 7:25

Ием, орындай гөр маған берген сөзіңді, Содан бәрі терең қастерлесін Өзіңді. Сонда сөккенге жауап бере аламын, Сенің сөзіңе сенімімді артамын. Ескере гөр пендеңе берген уәдеңді, Өзің қалайсың соған үміттенуімді. Жат жерлік болып тұрған жақтарда мен Жарлықтарыңды жырлап жүремін. Мыңдаған алтын-күміс ақшалардан Аузыңнан шыққан тәлімің қымбат маған! Сенің айтқан сөздерің, Жаратқан Ием, Көкте тұр мәңгілікке бекітілген! Күллі келер ұрпаққа адал боласың.

Забур жырлары 118:38, 42, 49, 54, 72, 89–90

Сондықтан Құдай да Өзінің уәдесін иемденетіндерге алға қойған мақсатының мызғымас екенін өте айқын көрсеткісі келгенде, айтқандарын антпен бекітті. Осылайша біз бұл екі мызғымас негізге (Құдайдың уәдесі мен антына) сүйеніп, олардан зор күш-жігер аламыз. Себебі Құдайдың өтірік айтуы еш мүмкін емес қой. Бізге ұсынылған осы үміттен күдер үзбей, Одан пана таптық. Бұл үмітіміз — берік зәкір сияқты жанымыздың сенімді сүйеніші; ол көктегі киелі үйдің ішіндегі «шымылдықтың арт жағында» Құдайдың Өзімен бекітілген. Сол жерге Исаның Өзі кіріп, осы арқылы бізге де сонда кіруге жол ашты.

Еврейлерге хат 6:17–20

Құдай бізге аса құнды да тамаша уәделерін берді.

Петірдің 2-хаты 1:4