Күнделікті нұр, 22 наурыз: Адам не ексе, соны орады дейді

Лут айналасына көз тастап, бүкіл Иордан өзені аңғарының Сиғорға дейін сулы жер екенін көрді. Себебі бұрын сол жердің суы мол болып, Жаратқан Иенің пейіш бағына және Ніл бойындағы Мысыр еліне ұқсайтын. ... Сонымен Лут өзіне шығыста орналасқан бүкіл Иордан алқабын таңдап алып.

Жаратылыстың баст. 13:10–11

Ал әділ Лутты Тәңір Ие аман сақтап қалды. ... Сол ізгі жан олардың арасында тұрып.

Петірдің 2-хаты 2:7–8

Алданбаңдар: Құдай адамның Оны елемей, өз бетімен жүруіне жол бермейді. «Адам не ексе, соны орады» дейді.

Ғалаттықт. хат 6:7

Луттың әйелімен болған жайтты естеріңе түсіріңдер!

Лұқа 17:32

Сенбейтіндермен қоян-қолтық бірге жүріп, жаман ниеттеріне ортақтаспаңдар! Себебі әділдік пен заңсыздық арасында ортақ не бар? Яки жарық пен түнек қалай тығыз байланыста тұрмақ? Жаратқан Ие мынаны айтады: Сондықтан олардың арасынан шығыңдар! Олардан бөлек тұрыңдар, арам нәрселеріне мүлдем жоламаңдар!

Қорынттықт. 2-хат 6:14, 17

Сондықтан олардың іс-әрекеттеріне сыбайлас болмаңдар! Бұрын сендер түнек болдыңдар, ал енді Иемізбен байланысып, «нұрсыңдар»: ендеше «нұрдың адамдары» болып әрекет етіңдер! Құдай Иеге не ұнайтынын біліп алып, түнектегі адамдардың бекер істеріне араласпаңдар, қайта, оларды әшкерелеңдер!

Ефестікт. хат 5:7–8, 10–11

Олардың қалалары үлкен және күшті бекітілген. Алайда Жаратқан Ие Өзі айтқандай маған жар болса, оларды қуып шыға аламын.

Ешуа 14:12

Мен сені ешқашан тастап та кетпеймін, жалғыз да қалдырмаймын, — деген ғой. Сондықтан да біз: «Ием маған жар, мен қорықпаймын ешбір жайттан, не істей алады адам баласы маған?» деп нық сеніммен айтамыз.

Еврейлерге хат 13:5–6

Жаратушы Тәңір Ием, құдіретіңді ойлаймын, Тек Сенің әділдігіңді жұртқа жариялаймын.

Забур жырлары 70:16

Әділдіктің жемісі амандық пен бейбітшілік болмақ. Иә, әділдік мәңгі бақи тұрақты тыныштық пен қауіпсіздік әкелмек.

Ишая 32:17

Сонымен, шындықпен «белді бекем буып», әділдікті «сауыт қылып киіп», табанды тұрыңдар! Біз адам баласына қарсы емес, қазіргі қара түнектің әкімдері мен күштілеріне әрі дүниені билеп-төстеушілеріне: көзге көрінбейтін дүниедегі зұлым рухтарға қарсы күресудеміз. Сондықтан Құдай берген «рухани қару-жарақтың» бәрін асыныңдар! Сөйтіп зұлым күштер шабуыл жасаған күні қарсы тұрып, ақырына дейін күресіп, жеңіп шыға аласыңдар.

Ефестікт. хат 6:14, 12–13

Жаратқан Ие саған жар, мықты батыр! ... осы құдіретіңмен Исраилді мадияндықтардың қолынан құтқарып ал!

Билер 6:12, 14