Күнделікті нұр, 18 ақпан: Басыма күн туғанда Сені паналаймын

Басыма күн туғанда Сені паналаймын.

Еремия 17:17

«Кім бізге жақсылық жасар?» деп сұрап, Күдік келтіреді көптеген кісілер. Уа, Жаратқан, жылы шыраймен қарап, Бет-жүзіңнің нұрын бізге төге гөр.

Забур жырлары 4:7

Ал Сен пәлеге ұшырағанымда Маған болдың қорған және баспана, Сондықтан әнге салып құдіретіңді, Таңертеңнен паш етем мейіріміңді.

Забур жырлары 58:17

Аман-сау болғанда мақтанған едім: «Мен ешқашан да толқымаймын!» дедім. Уа, Жаратқан Ием, Саған сиындым, Қолдау сұрап Өзіңе жалбарындым: «Өліп, көрге түсуімнен не пайда, Топырақ сонда Сені мадақтар ма, Адалдығыңды Сенің жариялар ма?! Құлақ түрші, уа, Ием, рақым ете гөр, О, Жаратқан Ие, қолдаушым бола гөр».

Забур жырлары 29:7, 9–11

«Сені біраз уақытқа тастап кетіп едім, бірақ зор сүйіспеншілікпен Өзіме қайтарып алып келемін. Қаһарланған кезде сенен бір сәтке бетімді жасырған едім. Алайда мәңгілік сүйіспеншілігіммен саған рақым етемін», — дейді сені құтқарып алған Қамқоршың Жаратқан Ие.

Ишая 54:7–8

Бірақ қайғыларың қуанышқа айналатын болады.

Жохан 16:20

Кешке жылап-сықтау басым болады, Ал таң ата қуаныш тосып тұрады.

Забур жырлары 29:6

Адам ата жүз отыз жасқа келгенде өзіне ұқсас бір ұлды болып, оған Сет деп ат қойды.

Жаратылыстың баст. 5:3

Арам адамнан адал нәрсені кім шығара алады?

Әйүп 14:4

Мен күнәкар болып дүниеге келдім, Құрсақта жатқанда-ақ күнәкар едім.

Забур жырлары 50:7

Күнә жасай беріп, рухани өлі едіңдер. ... Басқаларға сияқты бізге де Құдайдың қаһарының төгілетіні табиғатымыздан белгілі еді.

Ефестікт. хат 2:1, 3

Ал мен пенде ретінде күнәлі құмарлықтардың құлдығындамын. Не істеп жүргенімді өзім де түсінбеймін: қалағанымды емес, керісінше, жек көретінімді істеп жүрмін. Менің бойымда, яғни ескі күнәкар болмысымда, жақсылық жоқ екенін білемін.

Римдіктерге хат 7:14–15, 18

Бұдан шығатын қорытынды мынау: бір адам арқылы дүниеге күнә ... Бір кісінің Құдайға мойынсұнбауы көптеген адамдарды күнәкар етті. Дәл солай.

Римдіктерге хат 5:12, 19

Сол бір кісінің күнәсі арқылы бүкіл адамзат ажалды болды, ал Құдайдың рақымы және Оның бір Кісінің, яғни Иса Мәсіхтің рақымы арқылы берген сыйы одан қаншама зор! Осы сый көптеген адамдарға молынан тиді.

Римдіктерге хат 5:15

Себебі Иса Мәсіхпен тығыз байланыстырып, жаңа өмір сыйлаған Киелі Рух мені күнәлі құмарлық пен рухани өлімнің күштеуінен азат етті.

Римдіктерге хат 8:2

Құдайға шүкірлік етейік! Ол бізге Иеміз Иса Мәсіх арқылы жеңісті сыйлайды.

Қорынттықт. 1-хат 15:57