Күнделікті нұр, 24 ақпан: Жаратқан Ие, Сен рухани Әкемізсің

Жаратушы Тәңір Ие тағы мынаны айтады: «Мен Исраил халқының өтінішіне жауап беріп, олар үшін мынаны істеймін: халықты отардағы қойлардың көбейгеніндей мейлінше көбейтемін.

Езекиел 36:37

Бәрібір иемденбейсіңдер, өйткені оны Құдайдан сұрамайсыңдар.

Жақыптың хаты 4:2

Құдайдан сұраңдар, сонда Ол сендерге (мұқтаждарыңды) береді; іздеңдер, сонда табасыңдар; есікті қағыңдар, сонда ол сендерге ашылады. Себебі сұрай берген әркім алады, іздей берген табады, қағып тұрғанға есік ашылады.

Матай 7:7–8

Біз Оның еркіне сай бір нәрсе сұрасақ, Құдай тілегімізге құлақ салады деп нық сенеміз. Не сұрасақ та, Құдай бізге құлақ салады деп білсек, Оның тілегенімізді беретінін де білеміз.

Жоханның 1-хаты 5:14–15

Ал егер кейбіреулерің даналыққа мұқтаж болсаңдар, Құдайдан сұраңдар, Ол береді. Тәңір Иеміз еш жазғырмай-ақ бәріне жомарттықпен бере салады.

Жақыптың хаты 1:5

Ауыздарыңды ашыңдар айқара, Мен оларды толтырамын жақсылыққа.

Забур жырлары 80:11

Иса шәкірттеріне әрқашан үмітін үзбей Құдайдан сұрай берудің керектігін де астарлы әңгімемен түсіндіріп.

Лұқа 18:1

Жаратқан Ие әділдерге назар аударады, Өзіне жалынған оларға құлақ салады. ... Иеміз құлақ салады, Күллі қиындықтан оларды құтқарып алады.

Забур жырлары 33:16, 18

Сол уақытта Менің атымнан сұрайсыңдар; Менің сендер үшін Әкеден өтінуімнің қажеті болмайды, өйткені Әкенің Өзі сендерді сүйеді. Себебі сендер Мені сүйіп, Құдайдан келгеніме сенесіңдер ... Енді сұраңдар да алыңдар! Сонда шексіз қуанышқа кенелесіңдер.

Жохан 16:26–27, 24

Ал ауыртпалық жіберсе, содан бас тарту дұрыс па өзі? — деп жауап қатты.

Әйүп 2:10

Сенің шешімдеріңнің әділдігін мойындаймын, Мені жазалағаның да әділ, уа, Жаратқаным.

Забур жырлары 118:75

Жаратқан Ие, Сен рухани Әкемізсің. Сен құмырашыға, біз саз балшыққа ұқсаймыз. Бәріміз Сенің қолыңнан шыққан жаратылысыңбыз.

Ишая 64:8

Ол Жаратқан Ие ғой, Оның әділ еркі орындалсын, — деді.

Патшалықтар 1-ж. 3:18

Уа, Жаратқан Ие, мен дауымды алдыңа салғанда, Сен әрқашан әділсің. Ал енді осы мәселелер жайлы Өзіңмен сөйлеспекпін.

Еремия 12:1

Сонда Ол күмісті балқытып, қоқысынан айырып тазартатын зергер іспетті леуіліктерді алтын-күмістей тазартып, зұлымдық атаулыдан арылтады.

Малахи 3:3

Иеміз Өзі сүйетін әркімді Түзетеді әрі тәрбиелейді, Бауырына басқан әр баласын да Жазалайды қажет болғанда.

Еврейлерге хат 12:6

Шәкірті ұстазына, қызметшісі қожайынына ұқсаса, соған қанағат тұтсын.

Матай 10:25

Құдайдың рухани Ұлы бола тұра, Мәсіх ауыр азаптар шеккен кезінде де Әкесіне мойынсұнуға үйренді.

Еврейлерге хат 5:8

Неғұрлым көбірек Мәсіх секілді азап шексеңдер, соғұрлым көбірек қуаныңдар. Сонда Мәсіх салтанатты ұлылықпен қайта оралып, ашық көрінген кезде де шаттанып қуанатын боласыңдар.

Петірдің 1-хаты 4:13

Ол маған былай деп түсіндірді: — Бұлар — зор қудалану кезеңінен өткендер. Олар шапандарын Тоқтының төгілген қанымен «жуып» аппақ қылды.

Аян 7:14