Енді Дәуіттің жағдайында дұрыс тәртіптің сақталуының қуанышты нәтижесін көрейік. Егер дұрыс тәртіпті қайдан табу керектігін білгіңіз келсе, Мысырдан шығу 25:13–15-ті оқыңыз. Сандық тек сол тәртіппен тасымалдануы керек еді. Құдай оны жеткілікті түрде анық жазған болатын. Бірақ Дәуіт Киелі кітабын абайсыз оқыған еді. Дәуіттің жаңа арбасы қолданыста болғанда, біз сүріну, өлім, наразылық және көңілсіздік көрініс тапқанын; ал қуаныш, шаттық және ғибадаттың жоқтығымен ерекшеленгенін көреміз. Дұрыс тәртіп сақталғанда мұның бәрі керісінше болады: «қатты қуанышпен дауыс көтеру» (16-тармақ) естілді.
Кернейлерді тек діни қызметкерлер үрлей алатын. Қауымды жинайтын белгіні беру үшін діни қызметкер қажет (Сандар 10). Ал есікшілер кімдер еді? Олар сандыққа барынша қамқорлық жасады. Әрине, ғибадат үшін жиналған қауымның тәртібіне, Інжілдің куәлігіне, Құдай Сөзінің қызметіне және бүгінгі күні Оның қауымына қабылдауға қатысты, мұндағы есікшілердің рухына ие болу өте маңызды. Біз Мәсіхке және Оның мүдделеріне қатысты барлық нәрсеге өте мұқият болуымыз керек.
Бұл мойынсұнудың нақты нәтижесі. «Жаратқан Иенің келісім сандығын көтеріп бара жатқан леуіліктерге Құдай жәрдемдесті» (1 Жылнама 15:26). Құдайдың леуіліктерге қалай назар аударғанын байқаңыз, істер Оның ойы бойынша болғанда — оларға көмектесіледі, содан кейін құрбандықтарда Құдайға қарай ағылған ғибадатты көресіз. Егер сіз бен біз Жаратқан Иенің Сөзіне шынымен мойынсұнуға бел бусақ, қандай шығын болса да, біз де Құдайдың бізге көмектесетінін, және жанымызда қуаныш пен ғибадат, сондай-ақ Құдайға қарай жемісті қызмет болатынын табамыз.
