Күнделікті нұр, 29 қараша: Енді сенесіңдер ме? (Жохан 16:31)

Сонда кенелеміз үйіңнің жақсылығына, Киелі ғибадатханаңның рақатына.

Забур жырлары 64:5

Иемнен бір-ақ нәрсені сұрадым, Тек мынау ғана менің аңсағаным: Өмір бойы Оның үйінде болсам, Жаратқан Иенің көркіне қарасам, Ғибадатханасында ойланып-толғансам.

Забур жырлары 26:4

Әділдікті аңсап зарыққандар бақытты: олар қанағат табатын болады!

Матай 5:6

Ашыққандарды игілікке кенелтіп, Байларды құр қол қайтарып қуады.

Лұқа 1:53

Сусаған адамның шөлін Ол қандырды, Қарны аш жанды нәрлі аспен тойдырды.

Забур жырлары 106:9

Шынайы өмір сыйлайтын «нан» Менмін. Маған келгендер рухани нәрден тарықпайды, Маған сенгендер ешқашан шөлдемейді!

Жохан 6:35

Уа, Құдай, Сенің рақымың қандай қымбат, Қанатыңның астын паналайды адамзат, Әлеміңнің игілігіне тойдырасың, Өзеніңнің рақатына қандырасың. Өйткені өмірдің қайнары Өзіңсің, Жарықты көреміз нұрыңда Өзіңнің.

Забур жырлары 35:8–10

Енді сенесіңдер ме?

Жохан 16:31

Бауырластарым менің, біреу сенемін дей тұра, игі істер жасамаса, онысынан не пайда?! Сондай сенімі оны Тәңір Иенің қаһарынан құтқара ала ма? Ендеше, сенім игі іс-әрекет тудырмаса, ол — өлі сенім.

Жақыптың хаты 2:14, 17

Ыбырайым сенімі сыналғанда Құдайға нық сенгендіктен Ысқақты құрбандыққа ұсынды. Ол туралы «сенің ұрпағың Ысқақтан тарайтын болады» деген уәде алғанымен, Ыбырайым жалғыз ұлын құрбан етуге дайын болды. Ыбырайым Құдай баламды өлімнен қайта тірілтуге де құдіретті деп есептеді.

Еврейлерге хат 11:17–19

Түп атамыз Ыбырайым баласы Ысқақты құрбандыққа ұсынғанда сол ісі арқылы Құдай алдында ақталды емес пе? Өздерің көріп отырғандай, Тәңір Иенің алдында адамды тек оның сенімі ғана емес, істегендері де ақтайды.

Жақыптың хаты 2:21, 24

Ал кім кемелді тәлімге, яғни күнәнің құрсауынан азат ететін Ізгі хабарға, ұқыпты ден қойып, онысын ұдайы жалғастыра берсе, сол ұмытшақ тыңдаушы емес. Қайта, ол естігендерін жүзеге асырушы болып, іс-әрекетінде жарылқанбақ.

Жақыптың хаты 1:25

Адамдарды да «жемістерінен» танып білесіңдер. Маған: «Мырза, Ие!» дейтін әркім емес, көктегі Әкемнің еркін орындайтындар ғана Оның Патшалығына кіре алады.

Матай 7:20–21

Мұны біліп, осылай іс-әрекет етсеңдер, бақытты боласыңдар!

Жохан 13:17