Күнделікті нұр, 17 желтоқсан: Сиынатын боламыз Сенің атыңа

Сиынатын боламыз Сенің атыңа, Өмірімізді жаңарта гөр тағы да.

Забур жырлары 79:19

Шынайы өмір Беруші — Киелі Рух.

Жохан 6:63

Сонымен қатар әлсіреген бізді Киелі Рух та қолдайды. Тәңір Иеден не тілейтінімізді дұрыстап білмесек те, Киелі Рухтың Өзі біз үшін өтініш етіп, сөзбен айта алмас ыңқыл, күрсінісімізді Оған жеткізеді. Ал Тәңір Ие адам жүрегінің түкпір-түкпіріндегіні біледі. Киелі Рух Құдайдың адамдары үшін Оның еркіне сай өтініш жасағанда Құдай Киелі Рухтың ниетін де түгелдей түсінеді.

Римдіктерге хат 8:26–27

Киелі Рух арқылы әрдайым Құдайға сиынып, барлық өтініштеріңді айтып, рухани сергек те шыдамды болыңдар.

Ефестікт. хат 6:18

Ешқашан ұмытпаймын ережелеріңді, Солармен аман сақтайсың өмірімді.

Забур жырлары 118:93

Сендерге айтқан сөздерім арқылы рухани өмірге ие бола аласыңдар.

Жохан 6:63

Жазылған заңдар рухани өлім әкеледі, ал Киелі Рух шынайы өмір сыйлайды.

Қорынттықт. 2-хат 3:6

Ал егер сендер Менімен тығыз байланыста тұрсаңдар, әрі Менің сөздерім өздеріңмен бірге болса, қалағандарыңның бәрін көктегі Әкемнен сұраңдар, сонда аласыңдар.

Жохан 15:7

Біз Оның еркіне сай бір нәрсе сұрасақ, Құдай тілегімізге құлақ салады деп нық сенеміз.

Жоханның 1-хаты 5:14

Әрі Киелі Рухтың жетелеуінсіз ешкім де «Иса — Жаратқан Ие» деп шын жүректен мойындай алмайды.

Қорынттықт. 1-хат 12:3

Түнектегі адамдардың бекер істеріне араласпаңдар, қайта, оларды әшкерелеңдер!

Ефестікт. хат 5:11

Мұндайды айтқандарға алданып қалмаңдар! (Былай делінген ғой:) «Араммен араласып жүрген жан Айырылар адал салтынан».

Қорынттықт. 1-хат 15:33

Азғана ашытқы бүкіл қамырды ашытады дегенді білмейсіңдер ме? «Ескі ашытқыдай» (күнә атаулыны) араларыңнан шығарып тастаңдар! ... Өткендегі хатымда сендерге «Азғындармен араласпаңдар!» деп жазған болатынмын. Онда мен осы дүниелік азғын, дүниеқоңыз, қарақшы немесе жалған тәңірлерге құлшылық етуші адамдарды ойлаған жоқпын. Әйтпесе бұ дүниеден түгелдей безіп кетуге тиіс болар едіңдер ғой. Алайда өзін сенімдегі бауырласпын деп атағанмен, азғын, дүниеқоңыз, жалған тәңірлерге құлшылық етуші, өсекші, маскүнем немесе алаяқ болып жүрген ешкіммен де араласпауларың керек. Мұндайлармен тіпті дастарқандас та болмаңдар.

Қорынттықт. 1-хат 5:6–7, 9–11

Осылай қазіргі азғын да алдамшы ұрпақтың арасында еш кінәсіз таза, Құдайдың мінсіз рухани балалары болыңдар: қараңғы дүниеде жарық жұлдыздай жарқырап.

Філіпілікт. хат 2:15

Бір үлкен үйде алтын мен күмістен ғана емес, ағаш пен қыштан жасалған ыдыс-аяқтар да бар: алдыңғылары қадірмен тұтылса, соңғылар қадір-құрметтен ада. (Сол сияқты, қауымның көптеген мүшелері игі істерімен Құдайды құрметтесе, басқалары жамандықтарымен Оның даңқы мен ісіне нұқсан келтіреді.).

Тімотеге 2-хат 2:20