Күнделікті нұр, 27 шілде: Мәсіх адам болып дүниеге келді

Содан олар Мәсіхтің салтанатты ұлылығы туралы Ізгі хабардың нұрын көре алмайды.

Қорынттықт. 2-хат 4:4

Сонда Жаратқан Иенің ұлылығы Бар адамзатқа көрінетін болады, (Оның өз халқын құтқарып алғанын) Барлығы да ап-анық көре алады.

Ишая 40:5

Құдайды ешкім ешқашан көзімен көрген емес. Әкесімен тығыз байланыстағы жалғыз рухани Ұлы бізге Оны жақыннан танытты. Сөз адамға айналып, арамызда өмір сүрді. Сонда біз Әкенің жалғыз рухани Ұлының асқан ұлылығын көрдік: Ол рақымдылық пен шындыққа толы еді.

Жохан 1:18, 14

Філіп? Кім Мені көрсе, соның Әкені де көргені.

Жохан 14:9

Одан Құдайдың салтанатты ұлылығы жарқырап көрінеді: Ол — Құдайдың болмысының дәлме-дәл сипаты.

Еврейлерге хат 1:3

Мәсіх адам болып дүниеге келді.

Тімотеге 1-хат 3:16

Оның құрбандық өлімі арқылы күнәларымыздың құны өтеліп, кешірімге ие болдық. Көзге көрінбейтін Құдайдың қандай екенін рухани Ұлы көрсетеді. Ол — жаратылыс атаулының бәрінен жоғары.

Қолостықт. хат 1:14–15

Құдай алдын ала білетін біздерді Өзінің рухани Ұлының үлгісіне ұқсасын, осылайша рухани Ұлы көптеген бауырластарының арасындағы тұңғышы іспетті аса қадірлі болсын деп бұрыннан белгілеп қойған еді.

Римдіктерге хат 8:29

Қазір біз топырақтан жаратылғанның кейпінде болғанымыздай, сол кезде көктен келген Мәсіхтің кейпіне ие боламыз.

Қорынттықт. 1-хат 15:49

Шайқасуға маған күш-қуат сыйладың.

Забур жырлары 17:40

Себебі өзім күшсіз болғанымда Ол арқылы күштімін.

Қорынттықт. 2-хат 12:10

Аса Құдай Иесіне дауыстап сиынып былай деді: «Уа, Жаратқан Ие, әлсізді мықтыдан қолдап-қорғайтын құдірет жалғыз Сенде ғана! О, Құдайымыз — Жаратқан Ие, бізді қолдай гөр! Біз Саған сенім артамыз, Сенің атыңмен осы қарақұрым тобырға қарсы аттанып шықтық. Уа, Жаратқан Ие, Сен біздің Құдайымызсың! Пенденің Өзіңнен басым болуына жол бере көрме!»

Шежірелер 2-ж. 14:11

Ал Жосапат (өз ұранын) айқайлап жіберді. Құдай Ие оған жар болып, бас салушыларды оның қасынан басқа жаққа бұрып алып кетті.

Шежірелер 2-ж. 18:31

Адам баласына сенім артқаннан гөрі Жаратқан Иені паналау сондай игі! Әмірші, әкімдерге сенім артқаннан гөрі Жаратқан Иені паналау сондай игі!

Забур жырлары 117:8–9

Патшаны қалың жасағы құтқармайды, Жауынгер зор күшімен қорғана алмайды, Тұлпар да құтқаруға жарамайды, Ерен күшімен де құтылта алмайды.

Забур жырлары 32:16–17

Біз адам баласына қарсы емес, қазіргі қара түнектің әкімдері мен күштілеріне әрі дүниені билеп-төстеушілеріне: көзге көрінбейтін дүниедегі зұлым рухтарға қарсы күресудеміз. Сондықтан Құдай берген «рухани қару-жарақтың» бәрін асыныңдар!

Ефестікт. хат 6:12–13