Күнделікті нұр, 8 тамыз: Бұл Иемізден — Киелі Рухтан келеді

Әділдің жолы таң шапағы іспетті Тал түс болғанша жарқырай түседі.

Нақыл сөздер 4:18

Бұған әлі жете қойған жоқпын, өзімді Құдайдың көздегеніндей жетілдім деп те есептемеймін. Бірақ соның ізіне түсіп, иемденуге тырысудамын. Дәл осыған бола Мәсіх Исаның Өзі мені иемденіп алды ғой.

Філіпілікт. хат 3:12

Ендеше Жаратқан Иені мойындап, Оны жақыннан танып білуге жан сала ұмтылайық!

Ошия 6:3

Ал әділдер көктегі Әкелерінің Патшалығында күн сәулесіндей жарқырайтын болады.

Матай 13:43

Бәріміз бетімізді бүркемей, ашық түрде Иеміздің салтанатты ұлылығына айнадан көргендей мұқият көз жібереміз. Осылайша Ол бізді Өзіне ұқсатып, өзгертіп келеді. Сол арқылы Оның салтанатты ұлылығы барған сайын бізден көбірек көрініс табады. Бұл Иемізден — Киелі Рухтан келеді.

Қорынттықт. 2-хат 3:18

Алайда жетілгендік келген кезде Шектеулінің барлығы да бітеді.

Қорынттықт. 1-хат 13:10

Сол сияқты, біздің қазір көргеніміз Айнадағы көмескі бейне іспетті, Ал болашақта бетпе-бет анық көреміз. Қазіргі білетінім тек қана шектеулі, Ал Құдайдың мені толық білетіні секілді, Бәрін де толықтай білемін сол кезде.

Қорынттықт. 1-хат 13:12

Сүйікті бауырларым, қазір Құдайдың рухани балаларымыз, ал келешекте кім болатынымыз әлі анық емес. Алайда Мәсіх қайтып келгенде Оған ұқсайтынымызды білеміз. Себебі сол кезде Оның шынымен қандай екенін көретін боламыз. Оған осындай үміт артқан әркім Мәсіхтің кіршіксіз таза болғанындай, өзі де күнәдан арылып, тазарады.

Жоханның 1-хаты 3:2–3

Себебі: «Иеміздің атын атап Оған сиынған әркім құтқарылады» деп те жазылған.

Римдіктерге хат 10:13

Ал Мен Өзіме келгендерді ешқашан қуып жібермеймін.

Жохан 6:37

Патшалығыңызға кіргенде мені есіңізге ала көріңіз, — деп өтінді. Иса оған: — Саған шындығын айтамын: бүгін-ақ Менімен бірге жұмақта боласың! — деді.

Лұқа 23:42–43

Өздеріңе не істегенімді қалайсыңдар? — деп сұрады. Олар: — Тақсыр, көзімізді аша көріңіз! — деп өтінді. Иса оларға жаны ашып, көздеріне қолын тигізді. Сол сәтте-ақ көздері ашылып, көретін болды! Содан олар Исаға еріп жолға шықты.

Матай 20:32–34

Сонымен, өздерің күнәкар бола тұра балаларыңа жақсылық жасауды білсеңдер, көктегі Әкенің Өзінен сұрағандарға Киелі Рухын сыйлайтыны ешбір шүбәсіз!

Лұқа 11:13

Әрі бойларыңа өз Рухымды дарытамын ... Жаратушы Тәңір Ие тағы мынаны айтады: «Мен Исраил халқының өтінішіне жауап беріп, олар үшін мынаны істеймін: халықты отардағы қойлардың көбейгеніндей мейлінше көбейтемін.

Езекиел 36:27, 37

Біз Оның еркіне сай бір нәрсе сұрасақ, Құдай тілегімізге құлақ салады деп нық сенеміз. Не сұрасақ та, Құдай бізге құлақ салады деп білсек, Оның тілегенімізді беретінін де білеміз.

Жоханның 1-хаты 5:14–15