Күнделікті нұр, 27 мамыр: Жаратқан Ие ізгі (Нақұм 1:7)

Жаратқан Ие ізгі, басыңа қиындық түскен кезде Ол паналайтын қорғаның болады. Өзіне сенім артқандарды Ол жақыннан танып біледі.

Нақұм 1:7

Киелі үйге Өзіммен қарым-қатынастарына ризашылық білдіретін тартуларын алып келе жатқан адамдардың мақтау айтқан дауыстары тағы да естілетін болады.

Еремия 33:11

Құдай — біздің панамыз да күшіміз, Қиын кезде сенімді көмекшіміз.

Забур жырлары 45:2

Мен Жаратқан Иеге былай дейтін болам: Бас сауғалайтын панам әрі қорғаным, Сенімімді Саған артам, уа, Құдайым!

Забур жырлары 90:2

Қандай бақыттысың сен, Жаратқан Ие құтқарған аман-есен Өзіңдей басқа халық бар ма екен? Ол сені қалқандай қорғап-қолдайды.

Заңды қайталау 33:29

Күмән жоқ, Құдайдың жолы мінсіз, Жаратқанның сөзі де еш мүлтіксіз. Құдайға сенім артқан бар жандарға Ол — қалқандай қорған әрі берік баспана. Жаратқан Иеден басқа кім Құдай екен? Құдайымыздан басқа кім қорғайтын құз екен?

Патшалықтар 2-ж. 22:31–32

Ал Құдай Өзін сүйгенді жақсы біледі.

Қорынттықт. 1-хат 8:3

Бірақ Құдайдың салған негізі берік тұрады, онда мына сөздер «мөрленіп» жазылған: «Иеміз Өзінікі болған адамдарын жақсы біледі» және «Иеміздің атын атап сиынатын әркім жамандықтан алшақтасын!»

Тімотеге 2-хат 2:19

Әділдің қамын Жаратқан ойлайды, Ал құдайсыздың ізі де қалмайды.

Забур жырлары 1:6

Өйткені Мен саған ризамын, сені жақыннан танимын да, — деп уәде берді.

Мысырдан шығу 33:17

Жалпы, сендерді уайым-қайғы баспаса екен деймін.

Қорынттықт. 1-хат 7:32

Себебі Ол қамдарыңды ойлайды!

Петірдің 1-хаты 5:7

Себебі Жаратқан Ие Өзіне шын жүректен бағышталып, адал болып жүргендерді күш-қуат беріп қолдау үшін, бүкіл жер жүзін назарында ұстап отырады.

Шежірелер 2-ж. 16:9

Жаратқанның ізгілігіне көз жеткізіңдер, Қандай бақытты Оған сенімін жүктегендер! Арыстандар азыққа зәру жүре алады, Ал Иеге сенгендер бар игілікке тояды.

Забур жырлары 33:9, 11

Сондықтан сендерге мынаны айтамын: не ішіп-жейміз деп өмірлеріңді, не киеміз деп тәндеріңді уайымдамаңдар! Өмір тамақтан, тән киімнен артық қой! Әуеде ұшқан құстарға назар салыңдаршы: олар егін екпейді де, ормайды да, өнімін қамбаға жинамайды да, бірақ көктегі Әкелерің оларды асырайды. Ал сендер құстардан әлдеқайда артық емессіңдер ме?!

Матай 6:25–26

Еш нәрсені уайымдамай, барлық жағдайда өтініштеріңді Құдайға сиынып тілекпен және шүкірлікпен білдіріңдер! Сонда Құдайдың адам ақылынан асқан керемет тыныштығы сендердің жүректерің мен ой-саналарыңды Мәсіх Исада сақтайды.

Філіпілікт. хат 4:6–7