Күнделікті нұр, 19 қазан: Бұл жайында не дейміз?

Өйткені Жаратқан Ие сүйенішің болар, Жүрген өмір жолыңда сені тордан сақтар.

Нақыл сөздер 3:26

Пенденің ашуымен де даңқталасың, Оның қалған ашуын Өзің басасың.

Забур жырлары 75:11

Патшаның жүрегі Жаратқанның қолында Ұқсайды аққан суға өзен салаларында: Жаратқан бағыттайды оны қалаған жағына.

Нақыл сөздер 21:1

Адамның жолы Жаратқанға ұнаса, Тату қылар соның жауларын да.

Нақыл сөздер 16:7

Шын жүректен Иеме сенім артамын, Берген сөзіне үмітімді артамын. Күзетші күткендей таңның атуын, Қарауыл аңсағандай күннің шығуын, Жан-тәніммен Иемді күтіп сағынамын.

Забур жырлары 129:5–6

Жаратқанға сиындым, Ол жауап берді маған, Әрі азат етті мені бар қорқынышымнан.

Забур жырлары 33:5

Ежелден Құдай болып келеді баспанаң, Аясында боласың мәңгілік қолының, Ол жауыңды алдыңнан қуып шығады, Оны жойып құртуға бұйырады.

Заңды қайталау 33:27

Ал Жаратқан Иеге сенімін артатын, бар үмітін Оған жүктейтін адам бақытты!

Еремия 17:7

Бұл жайында не дейміз? Құдай жақтаса, бізге кім қарсы шыға алады?!

Римдіктерге хат 8:31

Оның сүйіспеншілігі көңілдеріңді жұбатқандықтан және өздерің Киелі Рухпен қатынаста жүріп, қайырымды да жанашыр болғандықтан.

Філіпілікт. хат 2:1

Пенденің өмірі қып-қысқа, соның өзі де әбден мазасыз. Адам гүл секілді өсіп шығып, солып қалады, өткінші көлеңкедей болған жерінде қала алмайды.

Әйүп 14:1–2

Мен көктегі Әкемнен сендермен мәңгі бірге болатын Қамқоршыны жіберуін өтінемін.

Жохан 14:16

Мен көктегі Әкемнен сендермен мәңгі бірге болатын Қамқоршыны жіберуін өтінемін, Ал Әкем Менің атымнан Қамқоршыларың — Киелі Рухты жібереді.

Жохан 14:16, 26

Иеміз Иса Мәсіхтің Әкесі Құдай мадақталсын! Құдай — қайырымды Әкеміз, жұбаныш пен жігер атаулының бастауы. Ол бізді барлық азаптарымызда жұбатып, жігерлендіреді. Осылай Құдайдың өзімізді жігерлендірген жұбанышымен біз де әр түрлі қайғы-қасірет шегіп жүргендерді жігерлендіре аламыз.

Қорынттықт. 2-хат 1:3–4

Исаның өліп, қайта тірілгендігіне кәміл сенеміз ғой. Сондықтан Оған сеніп бұ дүниеден кеткендердің Исамен бірге болулары үшін Құдайдың оларды қайта тірілтетініне де сенейік. ... Содан мәңгі бақи Иемізбен бірге боламыз. Бір-біріңді осы сөзбен жұбатыңдар!

Салониқал. 1-хат 4:14, 17–18