Күнделікті нұр, 12 қыркүйек: Сенімің арқылы құтқарылдың

Мен жүрген жолдарын анық көрсем де.

Ишая 57:18

Себебі Мен сендерді сауықтырушы Жаратқан Иемін.

Мысырдан шығу 15:26

(Ән-күйдің жетекшісіне арналған Дәуіттің жыры.) Уа, Жаратқан Ие, мені сынап тексердің, Сен мені толығынан танып білесің: Отырғаным, тұрғаным да Саған аян, Ойларымды біліп, ұғасың алыстан. Жүрейін не демалайын, көз алдыңдамын, Жолдарымның барлығы да Саған айқын.

Забур жырлары 138:1–3

Сен күнәларымызды қойдың алдыңа, Нұрыңда айқын құпияларымыз да.

Забур жырлары 89:8

Оның көз алдында барлығы ашық та айқын көрініп тұр. Біз Құдайдың алдында есеп беруге тиіспіз.

Еврейлерге хат 4:13

Жаратқан Ие былай деп шақырады: «Келіңдер, мәселелеріңді талқылап, шындығына жетейік! Күнәларың ал қызыл болса да, рақым етіп, сендерді қардай аппақ қылмақпын. Қылмыстарың қан қызыл болса да, сендерді кешіріп, аппақ жүндей ағартпақпын.

Ишая 1:18

Оны көрге түсуден аман сақтап қала гөр! Оның жанының құнын өтейтін төлемді таптым! деп мейірім көрсететін болады.

Әйүп 33:24

Алайда Құдайдың Қызметшісі біздің күнәларымыз үшін түйреліп, біздің әділетсіз істеріміз үшін құртылды. Оның тартқан жазасы бізге амандық пен тыныштық әкелді. Оның жараларының арқасында біз (рухани дертімізден) сауықтық.

Ишая 53:5

Жаратқан Ие мені жарлыларға ізгі хабар жеткізуге және жаралы жүректерді жұбатып орнықтыруға тағайындады.

Ишая 61:1

Сенімің арқылы құтқарылдың. Аман-есен қайта бер, қиналған дертіңнен айықтың! — деді.

Марқа 5:34

Ием маған жар.

Забур жырлары 117:7

Қиын-қыстау кезде Ием саған құлақ салсын, Жақыптың Құдайы бар пәледен сақтасын, Ол киелі үйінен саған көмек жіберсін, Сиондағы тұрағынан нығайта көрсін, Сонда жеңісіңе қуана әндетеміз, Құдайымыздың атынан ту көтереміз ... Кейбір ұлт мақтанады күймелерімен, Басқалар мақтанады тұлпарларымен, Ал біз мақтанамыз Құдай Иемізбен. Сол халықтар құлайды жығылып, Ал біз нық боламыз берік тұрып.

Забур жырлары 19:2–3, 6, 8–9

Оның салтанатты ұлылығына қайран қалады. Өйткені Жаратқан Иенің дауылы су тасқынын қатты айдағандай, Өзі де тездете аттанып келеді.

Ишая 59:19

Сендер әлі күнге дейін қатты сыналған жоқсыңдар, еліктірген жағдайлар әдетте адамдардың бастарына түсіп жүргендегідей ғана болып келді. Ал Құдай Өзінің уәдесіне берік: Ол төзімдеріңнен артық сыналуларыңа жол бермейді. Еліктірілген кездеріңде соған шыдауға күш-қуат беріп, құтылып шығудың лайықты жолымен қамтамасыз етеді.

Қорынттықт. 1-хат 10:13

Бізге кім қарсы шыға алады?!

Римдіктерге хат 8:31

Ием маған жар, қорықпаймын ешбір жайттан.

Забур жырлары 117:6

Егер лаулап жанып тұрған пешке лақтырылсақ та, ғибадат етіп жүрген Құдайымыздың бізді құтқаруға құдіреті жетеді. Ол бізді сіздің қолыңыздан құтқаратын болады да!

Даниял 3:17