Күнделікті нұр, 12 наурыз: Ол не қаласа, соны істейміз

Жаратқан Ие саған бетінің нұрын төгіп рақымды бола көрсін, Жаратқан Ие саған бет-жүзін бұрып тыныштық сыйлай көрсін!

Руларды санау 6:25–26

Құдайды ешкім ешқашан көзімен көрген емес. Әкесімен тығыз байланыстағы жалғыз рухани Ұлы бізге Оны жақыннан танытты.

Жохан 1:18

Одан Құдайдың салтанатты ұлылығы жарқырап көрінеді: Ол — Құдайдың болмысының дәлме-дәл сипаты.

Еврейлерге хат 1:3

Бұлар оған сенбейді, себебі осы күнәкар дүниенің «тәңірі» (әзәзіл шайтан) олардың ой-саналарын соқыр қылып қойған. Содан олар Мәсіхтің салтанатты ұлылығы туралы Ізгі хабардың нұрын көре алмайды. Ал Мәсіх Құдайдың қандай екенін айқын көрсетеді.

Қорынттықт. 2-хат 4:4

Бет-жүзіңнің нұрын маған түсіре гөр, Мейіріміңе сай мені құтқара гөр. Мені ұятқа қалдырма, уа, Жаратқан, Себебі жалбарынып жүрмін Саған.

Забур жырлары 30:17–18

Ал мені таудай нығайтқан Сенің рақымың. Кейін бет-жүзіңді менен жасырдың, Сонда мен қорқып уайымға салындым.

Забур жырлары 29:8

Мадақтау жиналысына шақырған Қуанышты дауысты танып, қосылған Халық сондай бақытты, өйткені оған Жүзіңнің нұрында жүру бұйырылған.

Забур жырлары 88:16

Жаратқан Ие өз халқына күш дарытады, Тыныштық сыйлап ақ батасын қондырады.

Забур жырлары 28:11

Үрейлерің ұшпасын! — деп көңілдерін орнықтырды.

Матай 14:27

Ол не қаласа, соны істейміз.

Жоханның 1-хаты 3:22

Ал сенім артпай Құдайға ұнау мүмкін емес.

Еврейлерге хат 11:6

Сондықтан ескі күнәкар болмысының еркімен өмір сүретіндер Құдайға ұнай алмайды.

Римдіктерге хат 8:8

Жаратқан өз халқынан рақат табады.

Забур жырлары 149:4

Кейбіреулерің әділетсіз қиналғанда, Құдайдың еркінің солай екенін білгендіктен азапқа төзе берсеңдер, Ол соған риза. ... Ал жақсылық жасай тұра азап шегіп, соған шыдасаңдар, бұл Құдайға ұнайды.

Петірдің 1-хаты 2:19–20

Мейірімді де сабырлы жан дүниелеріңнің мәңгі солмайтын көркі Құдай алдында аса бағалы.

Петірдің 1-хаты 3:4

Мені мақтайтын жан құрмет көрсетеді Маған, Сақтанып жүргенге құтқаруымды ашам.

Забур жырлары 49:23

Сонда Құдайдың атын әнге қосамын, Шүкіршілік етіп мақтау айтамын. Көбірек ұнатады мұны Жаратқан Құрбандық мүйізді ірі қарадан.

Забур жырлары 68:31–32

Сонымен, бауырластарым, бізге осындай мол мейірімін төккені үшін өздеріңді Құдай жолына арнауға шақырамын. Өмірлерің Құдайға ұнамды, толықтай бағышталған, тірі құрбандықтай болсын: Оған лайықты рухани қызмет көрсетулерің осы болады.

Римдіктерге хат 12:1