Күнделікті нұр, 9 желтоқсан: Ол сенен нені талап етеді?

Күнделікті нұр

Адамның адалдық пен әділдік сақтағаны Жаратқанға құрбандық шалғанынан ұнамды.

Нақыл сөздер 21:3

— Уа, адам, Жаратқан Ие саған ненің игілікті екенін білдірген еді. Ол сенен нені талап етеді? Әділ істер істеп, мейірімділікті ұнатуыңды, әрі сиынатын Құдайыңмен тығыз байланыста болып кішіпейіл жүруіңді талап етеді емес пе?!

Миха 6:8

Бірақ Самуилдің жауабы мынау болды: — Жаратқан Иеге шын ұнайтын — Құрбандық пен басқа сый-тарту ма, Әлде Оған мойынсұнып, тілін алу ма?! Мойынсұну Оған артық сый-тарту атаулыдан, Еркіне бағыну қошқар майынан ұнамды Оған!

Патшалықтар 1-ж. 15:22

Оны шын жүректен, барлық ақыл-оймен, бүкіл жан дүниесімен, бар күш-қуатпен сүю әрі маңайындағы адамды өзіндей сүю Құдайға арналған құрбандықтар мен басқа да сый-тартулардың бәрінен де жоғары.

Марқа 12:33

Өзің де Құдайға қайта оралып, берік сүйіспеншілік пен әділдікті сақта! Әрқашан өз Құдайыңа үмітіңді арт!

Ошия 12:6

Ол Иеміз Исаның аяқ жағына отырып алып, сөзін құлақ салып тыңдады. Ал керегі бір-ақ нәрсе ғой: Мәриям игілікті жағын таңдап алды, оны содан ешкім айыра алмайды, — деді.

Лұқа 10:39, 42

Себебі Өзіне ұнайтын істерді қалап, жүзеге асыруларыңа түрткі болушы — Құдай.

Філіпілікт. хат 2:13

Жанымыз өзін сыйлаған Құдайға кері қайтады.

Уағыздаушы 12:7

Сонда Құдай Ие жердегі топырақтан адамды қалыптастырып жасап, оның мұрнына тіршілік лебін үрледі. Адам осылай тірі жан болып шыға келді.

Жаратылыстың баст. 2:7

Адамның бойында оның рухы бар, себебі құдіреті шексіз Тәңір оған өз тіршілік лебі мен рухын үрлеп берген болатын. Осы рух адамға саналы түсінік сыйлайды.

Әйүп 32:8

Алғашқы адам — Адам ата «осылай тірі жан болып шыға келді.

Қорынттықт. 1-хат 15:45

Адам баласының жанының көкке көтерілетінін.

Уағыздаушы 3:21

Әлі де қазіргі тәнімізде тұрғанда Иеміздің қасындағы мекенімізден алшақ екенімізді білеміз. Содан жігерлі болып, осы тәнімізді тастап, Иеміздің қасында орнығуды қалаймыз.

Қорынттықт. 2-хат 5:6, 8

Бұл бәрінен де анағұрлым жақсы.

Філіпілікт. хат 1:23

Қымбатты бауырластар, үміті үзілген басқалар сияқты қайғырмауларың үшін сендерді бұ дүниеден қайтқан сенушілердің жағдайы туралы хабарсыз қалдырмаймыз. Исаның өліп, қайта тірілгендігіне кәміл сенеміз ғой. Сондықтан Оған сеніп бұ дүниеден кеткендердің Исамен бірге болулары үшін Құдайдың оларды қайта тірілтетініне де сенейік.

Салониқал. 1-хат 4:13–14

Енді сол жерден сендер үшін орын дайындауға бара жатырмын. Барып, дайындап болғаннан кейін қайтып келіп, Өзім болатын жерде сендерді де болсын деп қасыма алып кетемін.

Жохан 14:2–3

Киелі кітап үзінділері Daily Light on the Daily Path кітабынан (қоғамдық игілік).