Күнделікті нұр, 18 қаңтар: Иә, ол солай болады да!

Кейінірек келген Мәсіх жайында көп нәрселерді жақсырақ түсіне аламыз.

Римдіктерге хат 5:14

Бірақ Исаның азапты өлім шеккені үшін Патша ретінде ғаламат салтанат пен құрметке бөленгенін көреміз. ... Құдайдың рақымының арқасында күллі адамзат үшін жанын қиды.

Еврейлерге хат 2:9

Бір Адам бәрі үшін өлгендіктен барлығы да рухани өлді.

Қорынттықт. 2-хат 5:14

Бір кісінің Құдайға мойынсұнбауы көптеген адамдарды күнәкар етті. Дәл солай, басқа бір Кісінің Құдайға мойынсұнуы арқылы көптеген адамдар ақталады.

Римдіктерге хат 5:19

Алғашқы адам — Адам ата «осылай тірі жан болып шыға келді», ал «Соңғы Адам» (Мәсіх) — мәңгілік өмір беретін Рух. Алдымен рухани емес, тәндік дене болды, «рухани» дене кейінірек пайда болады.

Қорынттықт. 1-хат 15:45–46

Құдай енді: Біз (рухани жағынан) Өзімізге ұқсас әрі бейнелес етіп адамды жаратайық ... Осылайша Құдай адамды (рухани жағынан) Өзіне ұқсас әрі бейнелес етіп.

Жаратылыстың баст. 1:26–27

Өткен заманда Құдай әлденеше рет түрлі жолдармен өз хабарын ата-бабаларымызға пайғамбарлар арқылы жеткізіп отырған. Ал осы соңғы заманда Ол бізге хабарын Өзінің рухани Ұлын жіберіп жеткізді. ... Одан Құдайдың салтанатты ұлылығы жарқырап көрінеді: Ол — Құдайдың болмысының дәлме-дәл сипаты.

Еврейлерге хат 1:1–3

Себебі Сен Маған берген адамдарыңның бәріне мәңгілік өмір сыйлауым үшін күллі адамзаттың билігін Менің қолыма тапсырдың.

Жохан 17:2

Топырақтан жаратылған алғашқы адам бұ дүниеден, ал «Екінші Адам» (Мәсіх) көктен келді. Бұ дүниелік адамдар топырақтан жаратылған Адам атаға ұқсас, ал көктен жаңа өмір алғандар көктен келген Мәсіхке ұқсас.

Қорынттықт. 1-хат 15:47–48

Қазіргі барды және одан кейін болатындарды жазып қой!

Аян 1:19

Алайда (Киелі жазбаларда) алдын ала жазылғандай, көз көріп, құлақ естімеген, адам ойына ешқашан келмеген игіліктерді Құдай Өзін сүйетіндерге дайындап қойған. Бұны Құдай біздерге Өзінің Киелі Рухы арқылы анық білдірді.

Қорынттықт. 1-хат 2:9–10

Көктегі Әкемнен естігенін айтады және болашақта не болатынын сендерге хабарлайды.

Жохан 16:13

Біліп алыңдар, Мәсіх бұлттармен қайтып келеді! Әркім де, Оны түйрегендер де Мәсіхті көзімен көреді, Жер бетіндегі барлық рулар үрейленеді, Ол туралы қайғырып, жылап еңірейді. Иә, ол солай болады да! Аумин.

Аян 1:7

Қымбатты бауырластар, үміті үзілген басқалар сияқты қайғырмауларың үшін сендерді бұ дүниеден қайтқан сенушілердің жағдайы туралы хабарсыз қалдырмаймыз. Исаның өліп, қайта тірілгендігіне кәміл сенеміз ғой. Сондықтан Оған сеніп бұ дүниеден кеткендердің Исамен бірге болулары үшін Құдайдың оларды қайта тірілтетініне де сенейік. Өйткені Иеміздің Өзі көктен түсіп, бұйрық береді, әрі бас періште шақырып, Құдайдың кернейі қатты дауыстайды. Сонда ең алдымен Мәсіхке сеніп бұ дүниеден кеткендер қайта тіріледі. Тірі жүрген біз мұнан соң солармен бірге Иемізбен кездесу үшін бұлттың үстімен көкке көтерілеміз. Содан мәңгі бақи Иемізбен бірге боламыз.

Салониқал. 1-хат 4:13–14, 16–17