Күнделікті нұр, 29 қаңтар: Иса оларға сене қоймады

Ажар өзіне тіл қатқан Жаратқан Иені «Маған көз қырын салатын Құдайсың» деп атады.

Жаратылыстың баст. 16:13

(Ән-күйдің жетекшісіне арналған Дәуіттің жыры.) Уа, Жаратқан Ие, мені сынап тексердің, Сен мені толығынан танып білесің: Отырғаным, тұрғаным да Саған аян, Ойларымды біліп, ұғасың алыстан. Жүрейін не демалайын, көз алдыңдамын, Жолдарымның барлығы да Саған айқын. Сөз шықпай тұрып-ақ менің аузымнан Оны толық білесің, уа, Жаратқан! Біліміңді ұға алмаймын ешқашан, Ол қол жеткізбес биік те ғажап маған!

Забур жырлары 138:1–4, 6

Жаратушының көз алдында бәрі аян, Бар жақсы мен жамандар айқын Оған.

Нақыл сөздер 15:3

Адамның күллі ісі Жаратқанның көз алдында, Ол баға береді пенденің бар жолына.

Нақыл сөздер 5:21

Бірақ Құдай жүректеріңде не бар екенін жақсы біледі. Адамдар бұларыңды жоғары бағалағанмен, Құдай алдында ол — жексұрындық.

Лұқа 16:15

Себебі Жаратқан Ие Өзіне шын жүректен бағышталып, адал болып жүргендерді күш-қуат беріп қолдау үшін, бүкіл жер жүзін назарында ұстап отырады.

Шежірелер 2-ж. 16:9

Иса оларға сене қоймады. Ол адам баласының көңіліндегісін толық білгендіктен, біреудің Өзіне ол туралы мәлімет беруін қажет етпеді.

Жохан 2:24–25

Сіз бәрін де білесіз, Сізді жақсы көретінімді де білесіз.

Жохан 21:17

Уа, Құдай Ием, Өзіңді шын жүректен мақтаймын, Әрі Сенің есіміңді мәңгі бақи даңқтаймын.

Забур жырлары 85:12

Мені мақтайтын жан құрмет көрсетеді Маған.

Забур жырлары 49:23

Қандай ғанибет — Жаратқан Иені мақтау, Уа, Хақ Тағала, есіміңе ән-жыр арнау, Таң ата жариялап рақымыңды, Кешке де Өзіңнің адалдығыңды.

Забур жырлары 91:2–3

Жаны барлар түгелдей мадақтасын Иемізді! Лайым мадақтаңдар Жаратқан Иені!

Забур жырлары 150:6

Сонымен, бауырластарым, бізге осындай мол мейірімін төккені үшін өздеріңді Құдай жолына арнауға шақырамын. Өмірлерің Құдайға ұнамды, толықтай бағышталған, тірі құрбандықтай болсын: Оған лайықты рухани қызмет көрсетулерің осы болады.

Римдіктерге хат 12:1

Адамдарды Өзінің қаны арқылы Құдайға бағыштап қасиетті ету үшін қала қақпасының сыртында азапталып, құрбан болды. Сонымен Мәсіх арқылы Құдайды үнемі мадақтап сый-тартуымызды ұсынайық: Оның «Жаратқан Ие» деген атағын ауызбен де мойындап, дәріптеуіміз біздің Тәңір Иеге арнаған құрбандығымыз болады.

Еврейлерге хат 13:12, 15

Иеміз Иса Мәсіхтің атымен Құдай Әкеге қай нәрсе үшін де ұдайы шүкірлік етіңдер!

Ефестікт. хат 5:20

Құрбандыққа шалынған Тоқты Билік пен байлықты, Даналық пен құдіретті, Құрмет, ұлылық пен дәріпті Қабылдауға әбден лайықты!

Аян 5:12