Күнделікті нұр, 14 ақпан: Өзге ештеңе аңсамаймын жерде де!

Солай Құдайдың әділ еркін толық орындауға тиіспіз, — деп жауап берді.

Матай 3:15

Сенің еркіңді орындауға құштармын, Уа, Құдайым, жүрегімде Сенің тағылымың.

Забур жырлары 39:9

Мені Таурат заңы мен Пайғамбарлар жазбаларының күшін жою үшін келді деп ойламаңдар: Мен оларды жою үшін емес, қайта, толық мағынасында жүзеге асыру үшін келдім. Сендерге шындығын айтайын: аспан мен жер жойылып кетпейінше, Таурат заңының бірде-бір әрпі, тіпті бір кішкентай сызығы да күшінен айырылмайды, әуелі бәрі де жүзеге асады.

Матай 5:17–18

Жаратқан Ие өз әділдігіне сай Таурат заңы мен тәлімін дәріптелуге лайық әрі тамаша етіп шығаруды жөн көрген еді.

Ишая 42:21

Егер Құдайдың әділ еркін дін мұғалімдері мен парызшылдардан артық орындамасаңдар, Оның Патшалығына еш кіре алмайсыңдар!

Матай 5:20

Біздің ескі күнәкар болмысымыз (Таурат заңын мүлтіксіз орындауға) дәрменсіз болғандықтан, осы заң істей алмағанды Құдайдың Өзі істеді: Ол Өзінің рухани Ұлын күнәміздің құнын өтеп құрбандық болу үшін күнәлі біздердің денеміздей денемен осы дүниеге жіберді. Біздің күнәмізге бола Құдай Оған үкім шығарып, Оның денесіне өлім жазасын тартқызды. Ондағы мақсаты — біздің ескі күнәкар болмысымыздың еркі бойынша емес, Киелі Рухтың еркіне сай өмір сүріп, Құдайдың заңының әділ талаптарын орындауымыз.

Римдіктерге хат 8:3–4

Адамдардың Таурат заңын ұстануға ұмтылысын Мәсіх тоқтатты, енді Оның құрбандық өліміне сенетіндер ақталады.

Римдіктерге хат 10:4

Исраилдіктердің арасындағы сендердің үлестерің де.

Руларды санау 18:20

Өзіңнен басқа кімім бар еді көкте? Өзге ештеңе аңсамаймын жерде де! Тәнім әлсіреп, жаным шаршағанмен, Уа, Құдай, мәңгілік жар боласың Сен, Жүрегімнің берік тірегі бола бересің.

Забур жырлары 72:25–26

Уа, Ием, маған жар болып келесің, Жарылқап мені амандық бересің, Тағдырым қауіпсіз қолыңда Сенің. Тамаша — маған тиген үлесім, Қатты ұнайды ғажайып мұрам.

Забур жырлары 15:5–6

Өзіме: «Жаратқан Ие — үлесім менің, Сондықтан үмітімді артам Оған!» деймін.

Жоқтау 3:24

Ережелеріңді қабылдадым мәңгі мұраға, Жүрегімді кенелтеді олар қуанышқа.

Забур жырлары 118:111

Уа, Ием, Сен сиынатын Құдайымсың, Таң сәріден мен Саған бет бұрамын, Сусыз жердемін кеуіп, құлазыған, Жан-тәніммен Сені аңсап сағынам. Өйткені Өзің менің қолдаушымсың, «Қанатыңның аясында» шаттанамын.

Забур жырлары 62:2, 8

Сүйіктім менікі, ал мен онікімін.

Таңдаулы ән 2:16