Күнделікті нұр, 18 қыркүйек: Көк пен жердің Иесі — Әке!

Рухани көзімді аша гөр менің, Тәліміңнен кереметтер көрейін.

Забур жырлары 118:18

Киелі жазбаларды түсінуге олардың саналарын оятты. Тағы сөзін жалғастырып.

Лұқа 24:45

Құдай өз Патшалығы туралы сырларды білуді оларға емес, сендерге ғана бұйырған.

Матай 13:11

Көк пен жердің Иесі — Әке! Осы жайттарды данышпандар мен білгіштерден жасырып қалып, оларды ашып көрсеткенің үшін Сені дәріптеймін. Иә, Әке, Саған осылай болғаны ұнап тұр, — деп мақтау айтты. Содан кейін Иса тағы былай деді.

Матай 11:25–26

Ал біз осы дүниелік рухты емес, Құдайдан келген Киелі Рухты қабылдадық, Соның көмегімен Құдайдың бізге сыйлаған игіліктерін біле аламыз.

Қорынттықт. 1-хат 2:12

Сенің ойларың маған тым жоғары, Уа, Құдай, қанша көп олардың саны! Санап шықсам барлық ойларыңды, Құм қиыршықтарынан көп болады! Бірақ оянған кезде әрдайым мен Бірге боламын әлі де Өзіңмен.

Забур жырлары 138:17–18

О, неткен бай Құдайдың даналығы, Неткен терең Оның білік-парасаты; Шешімдеріне адам ақылы жетпес, Жолдарын Оның ешкім зерттеп бітпес! «Кім Жаратқанның ақыл-ойын ұққан, Кеңесшісі болып бағыт берді Оған?» Себебі әлемнің бәрі де Құдайдан, Ол арқылы, Ол үшін пайда болған. Лайым Құдай мадақталсын әрқашан! Аумин.

Римдіктерге хат 11:33–34, 36

Сонда Құдай Лехидегі бір қуыс жерді қақ жарып, одан су аға жөнелді. Самсон судан ішіп, бойына күші қайтып, әл жинады. Сондықтан бұл қайнарды Ен-Хақоре (демек, Шақырғанның қайнары) деп атады. Лехиде осы су көзі әлі күнге дейін бар.

Билер 15:19

Егер Құдайдың өзіңе не сыйлағысы келгенін және су сұраған Адамның кім екенін білсең, сен Оның Өзінен су сұрар едің. Сонда Ол саған «өмір суын» берер еді, — деп жауап қатты.

Жохан 4:10

Кімнің жаны шөлдесе, сол Маған келіп, «ішсін»! Иса бұларды Киелі Рух туралы айтты; Оны Исаға сенгендер кейінірек қабылдады.

Жохан 7:37, 39

Менің не істейтінімді осы арқылы сынап көріңдер! — деп ұсынады Әлемнің Иесі. — Сонда Менің аспаннан мол жауын-шашын жаудырып, сендерді жарылқауымның ағыл-тегіл болатыны соншама, оның бәрін жайғастыратын орындарыңның да болмай қалғанын көресіңдер!

Малахи 3:10

Сонымен, өздерің күнәкар бола тұра балаларыңа жақсылық жасауды білсеңдер, көктегі Әкенің Өзінен сұрағандарға Киелі Рухын сыйлайтыны ешбір шүбәсіз!

Лұқа 11:13

Құдайдан сұраңдар, сонда Ол сендерге (мұқтаждарыңды) береді; іздеңдер.

Лұқа 11:9

Енді біз рухани балалары болғандықтан, Құдай Өзінің рухани Ұлының Рухын жүрегімізге дарытты. Сол Рух бізді: «Абба, Әке!» — деп Құдайға сиындырады.

Ғалаттықт. хат 4:6

Сендер өздеріңді құл етіп, қайтадан қорқытып жүретін рухты емес, Құдайдың рухани баласы еткен Киелі Рухты қабылдадыңдар. Ол арқылы біз Тәңір Иеге сиынғанда «Әке, Әке!» деп шақырамыз.

Римдіктерге хат 8:15