Күнделікті нұр, 7 қараша: Дәннен — жас жігіттері

Олар Жаратқанды мақтасын мейірімі үшін, Адамдарға істеген кереметтері үшін!

Забур жырлары 106:8

Жаратқанның ізгілігіне көз жеткізіңдер, Қандай бақытты Оған сенімін жүктегендер!

Забур жырлары 33:9

Ием, қандай мол Сенің ізгілігің: Өзіңді қастерлеп.

Забур жырлары 30:20

Өзім үшін жаратқан халқым Менің Ұлылығымды мақтап жариялайды.

Ишая 43:21

Ол бізді Иса Мәсіхтің арқасында рухани балалары етуге алдын ала белгілеп қойды; Оның ізгі еркі осы болған. Өзінің сүйікті рухани Ұлы арқылы бізге сыйлаған керемет рақымы үшін Құдай мадақтала берсін! Мұнымен Ол Мәсіхке басқалардан бұрын үміт артқан біздің (яғни яһудилердің) Өзінің ұлылығын мадақтауымызды көздеді.

Ефестікт. хат 1:5–6, 12

Бұл қандай игі де әдемі көрініс болмақ! Дәннен — жас жігіттері.

Зәкәрия 9:17

Жаратқан Ие барлығына ізгілікті, Бүкіл жаратылысына кең пейілді. Уа, Ием, бар істерің даңқыңды шығарсын, Адал адамдарың да Сені мадақтасын! Патшалығыңның даңқын олар асырады, Құдіретті істерің туралы айтады, Осылай адамзатқа құдіретіңді ұқтырсын Әрі Патшалығыңның даңқты ұлылығын.

Забур жырлары 144:9–12

Сол төзімді адамдарды бақытты деп санаймыз.

Жақыптың хаты 5:11

Шаттана аламыз. Себебі азаптың бізге шыдамды болуды үйренуге көмектесетінін білеміз. Шыдамдылықтан сенімділік туады, ал сенімділік бізге үміт береді. Бұл үміт алдамшы қиял емес, өйткені бізге сыйлаған Киелі Рухы арқылы Құдай жүрегімізді Өзінің сүйіспеншілігіне кенелтті.

Римдіктерге хат 5:3–5

Кезінде әрбір жаза қуаныш емес, реніш туғызады. Ал соны басынан өткізіп тәрбиеленгенге ол кейінірек әділдік пен тыныштықтың игілікті жемісін береді.

Еврейлерге хат 12:11

Бауырластарым менің, сендер алуан түрлі қиын сынақтарға ұшырағанда, бұл жайтты зор қуанышпен қабылдаңдар. Себебі сенімдеріңнің сыналып, берік те шынайы екендігінің дәлелденуі төзімділік тудыратынын білесіңдер. Тек төзімділіктерің іс жүзінде соңына дейін жетуге тиіс, сонда сендер рухани жағынан жетіліп те кемелденіп, ешбір кемшіліктерің қалмайды.

Жақыптың хаты 1:2–4

Қиын сынақты төзімділікпен басынан өткізіп жатқан әркім бақытты! Содан өтіп, сенімді екендігі дәлелденгеннен кейін, ол бәйге жүлдесіндей «шынайы өмірдің тәжін» иемденбек. Мұны Жаратқан Ие Өзін сүйгендерге сыйлауға уәде етті.

Жақыптың хаты 1:12

Сондықтан Мәсіхтің құдіретінің бойымда орнығуы үшін, күшсіздігіме қуана мақтанамын. ... Себебі өзім күшсіз болғанымда Ол арқылы күштімін.

Қорынттықт. 2-хат 12:9–10